ఈ పుట అచ్చుదిద్దబడ్డది
రేకు: 0038-3 కాంబోది సంపుటం: 06-156
పల్లవి:
ఏలరాఁడే చెలి నన్ను నెలయించి పచ్చవన్నె
చేలగట్టి పీలిచుంగు చెరిగినవాఁడు
చ. 1:
చీకటి మేని వాఁడు చెలువై నమణులకు
వేకటైన తరుణికి కూఁకటతో మగండు
రోఁకటి కైదువవాఁడు రోలఁ గట్టువడ్డవాఁడు
ఆఁకటికి పాలువెన్న లారగించేవాఁడు
చ. 2:
పంకజములోని యింతిం జంకంబెట్టి యంతఁబోక
అంకులచేతులవారి కాసచేసేవాఁడు
బింకపు రాకాసుల పేరుమాల్చినవాఁడు
వంకల వంకల మేన వన్నె వెట్టువాఁడు
చ. 3:
పాలవారియింటి పిన్న పాపఁడై తిరిగినాఁడు
గాలి దాగువాని మీఁదఁ గాలు సాఁచినాఁడు
పాలమీఁది కొండమిఁదఁ బల్లెగట్టిలోక మెల్ల
నేలుచున్నవాఁడు వేంకటేశుఁ డమ్మ యితడు